ისტორია
ჭავჭავაძეების მამულის საინტერესო და ამაღელვებელი ამბავი მე-19 საუკუნის დასაწყისიდან იწყება. ზუსტად 2 საუკუნის წინ, იმდროინდელი წარჩინებული ქართული საზოგადოების გამორჩეულმა სახემ, თავადმა ალექსანდრე ჭავჭავაძემ საგვარეულო მამული თავისი დროის კულტურულ-ინტელექტუალურ კერად და ულამაზეს ბაღნარად გადააქცია.
ალექსანდრე ჭავჭავაძე, წინანდლის ისტორიის მთავარი გმირი, დღემდე არ კარგავს აქტუალურობას. ეს ეპოქალური ადამიანი ერთდროულად იყო შესანიშნავი მეღვინე, პოეტი, ბიზნესმენი, სამხედრო პირი და ქართული რომანტიზმის ფუძემდებელი, ამასთან ერთად, ის გახლდათ პოლიგლოტი და მრავალმხრივ განათლებული ადამიანი. მისი თითოეული რეგალია ნოვატორობას და განვითარებისკენ მუდმივ სწრაფვას უკავშირდება. სწორედ ამიტომ, მიუხედავად იმისა, რომ წინანდლის მამულმა ჭავჭავაძეების შემდეგ რამდენიმე მფლობელი გამოიცვალა, ალექსანდრეს სახელი და გავლენა დღემდე მოჰყვება მას.